Muenayo BäMasaaba bäshaase. Ni na nywe muesitsana, ba baa tsowa tsowanisa lülomo lweffe LüMasaaba. Na basiimile naabi.
Iffe áno khu lumasaaba.org, khuli ni ïsangaalo ngali naabi, khuu nyala khuu rakikhao lübubi lwe LüMasaaba. Ambi ffeesitsana BäMasaaba, khua manya khuu kanikha LüMasaaba! Ne shi shii fuura khuu khuängalila ni shio, khuu soma ni khuu rona mu bukwalaafu.
Shino shilio khu lwe ïlomo ndi, abeele i khuli ni kamakambila kamarone, kaesi khunyala khu khuïyeetesa mu khu bumba ni khu khuönga tsïlomo tse LüMasaaba tta. Bakali bätaayi, ba baâ rona LüMasaaba, buli mundu aâ rona büronele bweewe, mu sambo yeewe.
Khukana khuu rangilisa, ïnganikha, khuu rona, atweela ni khuu rekeelesana mu LüMasaaba. Nga bino biondaru, ni bio bi bii na khunyalisisa khuu tsowa tsowanisa khuu rona lülomo lweeffe mu bukwalaafu.
Ffeesitsana BäMasaaba, be íBushiikha, be íMwombe ni be íBuyeea, lukanile khuäwulanisamo ïsambo yiesi khuronamo tsïlomo. Ne ffeesitsana khurama nga khurambisa ïsambo ni yio ndweela, i ye khu khuöngamo tsïlomo tsiesi khukanikha. Shishiene ishio, ni shio shi shii khunyalisisa iffe BäMasaaba khurama nga khurekeelesana buulayi, na lundi nga khuŋaŋasa shi shii li mu nganikha yeeffe.
Ise Mulongo ndi umuShiende. Na ronele bürone buno nga nnambisa Ïtsonga Ingwalaafu atweela ni tsïlomo tse íBuShiende. Ni na we, ndi khu khuu pilisa ndi, na we rona nga urambisa Ïtsonga Ingwalaafu atweela ni tsïlomo tse bürubuli bwoowo. Iyio ni yio ïsambo, ii na khunyalisisa khuu rekeelesana ni khuu tsowa tsowanisa LüMasaaba.
Na baäkaaniile ni lükoosi muesitsana, lïsaaye lya Masaaba. Muenayo 👊.
